«ՓՈՂԵՐԻԴ ՏԵՂՆ ԱՍԱ, ԹԵ ՉԷ` ԼԱՎ ՉԻ ԼԻՆԻ»

Նոյեմբերի 5-ին Արմավիրի մարզի Գեղակերտ գյուղում կրկին ավազակային հարձակում է տեղի ունեցել: Անհայտ անձինք մտել են գյուղի տներից մեկը, ծեծի ենթարկել, կապկպել տան բնակիչներին, թալանել տունը, ապա դիմել փախուստի: Դեպքի մանրամասները մեզ պատմեց հարձակման ենթարկված ընտանիքի մտերիմներից մեկը՝ հասկանալի պատճառներով չցանկանալով, որ ներկայացնենք իր տվյալները:

-Դեպքը եղել է գիշերը` երկուսից-երեքն ընկած ժամանակահատվածում: Հարձակվել եւ թալանել են ծեր` 85 եւ 75-ամյա  ամուսիններին: Նրանց պատմելով՝ քնած են եղել, երբ դռան շխկոց են լսել: Մինչեւ կհասցնեին վեր կենալ եւ հասկանալ, թե ինչ է կատարվում, երկու դիմակավորված անձինք ներխուժել են ննջասենյակ եւ սկսել քաշքշել դեռ անկողնում պառկած ամուսիններին: Ապա` «Փողերիդ տեղն ասա, թե չէ` լավ չի լինի» եւ նմանատիպ սպառնալիքներ հնչեցնելով` պահանջել են, որպեսզի հանձնեն տանը եղած գումարը, ոսկեղենը եւ բոլոր թանկարժեք ապրանքների տեղերն ասեն: Ամուսինը կնոջը խնդրել է, որ տա նրանց պահանջած բաները, մենակ թողեն, գնան: Մինչ կինը նրանց ասել է գումարի եւ ոսկեղենի տեղերը, նրանց սենյակից դուրս գտնվող մյուս երկու հանցակիցները մի լավ տակն ու վրա են արել տունը: Երբ տեսել են, որ ամուսինները ամեն ինչի տեղն ասում են, մի քանի հարվածներ են հասցրել ծերերին, ապա կապկպել ու շարունակել փորփրել ամեն ծակ ու ծուկ: Ամուսինների պատմելով՝ նրանք չորսն են եղել, երկուսը եղել են նրանց ննջասենյակում, կապկպել իրենց, իսկ մյուս երկուսը` կողքի սենյակներում: Այդ ամենը տեւել է ընդամենը կես ժամ:
- Ո՞վ է առաջինը հայտնաբերել իրենց:
- Դեպքի մասին տեղեկացել ենք առավոտյան: Հարեւանուհին, ով խնամում է ծերերին, մտել է տուն եւ տեսել ամուսնուն՝ կապկպած, իսկ կինը կիսապառկած, վատ վիճակում: Անմիջապես զանգել է ոստիկանություն:
- Որքա՞ն գումար են թալանել:
- Թալանել են իրենց տանը եղած ոսկեղենը` չեմ կարող ասել ինչքան էր, եւ գումար` երեք հարյուր հազար դրամ եւ հիսուն հազար ռուբլի:
Իսկ ահա Գեղակերտի համայնքի ղեկավար Սերյոժա Առաքելյանը հիշեց միայն, որ նմանատիպ դեպք գյուղում եղել է մեկ էլ 15 տարի առաջ, որը շատ շուտ բացահայտվել է:

ԻԼՈՆԱ ԱԶԱՐՅԱՆ