Հայկ Բաբուխանյանի գիրքը

Գովազդ
 

ԿԱՌԱՎԱՐՈՒԹՅԱՆ ՀԵՏ ՀԱՐՑ ՈՒ ՊԱՏԱՍԽԱՆ ԱԺ-ում 06.02.2013թ.

Հ.ԱԲՐԱՀԱՄՅԱՆ

-Հայկ Բաբուխանյան, 2-րդ խոսափող։

Հ.ԲԱԲՈՒԽԱՆՅԱՆ

-Հարգելի գործընկերներ, եթե գրավոր հարցիս գրավոր պատասխանը լիներ բավարար, ես չէի հիմա բարձրաձայնի։ Սակայն, ցավում եմ, որ բավարար չէ պատասխանը, իսկ գրավոր հարցերը երեքն էին, էստեղ խմբավորված ասենք։

Առաջինն այն էր, թե ի՞նչ է կատարվում, որպեսզի մարդասպան եւ ռասիստ Սաֆարովին տրվի ինչ-որ միջազգային իրավական բողոքարկման գործընթաց էդ հանցագործի նկատմամբ։ Ցավոք սրտի, պատասխանն այնպիսին է, որ նախապատրաստական փուլում է եւ լուսաբանումը՝ «դրա լուսաբանումը ներկա պահին նպատակահարմար չենք համարում»։

Ուրեմն, ես չգիտեմ՝ ով ի՞նչ է նպատակահարմար համարում, բայց կա Սահմանադրություն, որով մենք կարող ենք հարցեր տալ, կա կանոնակարգ, որտեղ գրված է, որ հարցերին պարտավոր են պատասխան տալ։ Եթե սա պետական գաղտնիք է, ուրեմն, պետք է գրել, որ պետական գաղտնիք է։ Եթե անգամ պետք չէ, որ այսպես լուսաբանվի, ապա մեր կանոնակարգի 7-րդ հոդվածն ասում է, որ՝ «Պարտավոր են պատգամավորին իր հարցի վերաբերյալ քննարկումից 3 օր առաջ հրավիրել, տեղեկացնել» եւ այլն, կարող էինք, ուրեմն, առանձին ռեժիմով դա քննարկել։ Այս հարցի պատասխանը, եթե չկա, չեմ ակնկալում։

Ակնկալում եմ մեկ ուրիշ հարցի պատասխան, որը նույնպես գրավոր ուղարկված էր, դա հասարակական կազմակերպությունների հետ է կապված։ Հասարակական կազմակերպությունների մի մասը չի կատարում օրենքով սահմանված պարտականությունները։ Այսինքն, օրենքը, մասնավորապես համապատասխան օրենքի 16-րդ հոդվածն ասում է, որ՝ «Կազմակերպությունն իր գործունեության եւ գույքի օգտագործման հաշվետվությունները պարտավոր է ներկայացնել կազմակերպության ժողովի հաստատմանը ոչ պակաս, քան 2 տարին մեկ անգամ, ապահովելով այդ հաշվետվությունների հրապարակայնորեն մատչելի լինելը»։

Հոկտեմբեր ամսից ես այստեղ հայտարարել եմ ամբիոնից, որ զբաղվելու եմ «Օտարերկրյա ագենտների մասին» օրենքով, որովհետեւ կան կազմակերպություններ հասարակական, որոնք հակապետական, հակահասարակական գործունեություն են ծավալում։ Դրա համար դիմեցի նախարարությանը Արդարադատության, որպեսզի այս կետի համաձայն տեսնեմ՝ այդ կազմակերպությունները որտե՞ղ են, որ ներկայացված է իրենց հրապարակայնորեն հաշվետվությունները։ Մինչեւ օրս ոչ տեղը գիտեմ, որտե՞ղ է դա, օրենքով պահանջվում է, որ լինի, ոչ էլ ստացել եմ այդ հաշվետվությունները նախարարությունից։ Այս է ամբողջ խնդիրը։

Հ.ԱԲՐԱՀԱՄՅԱՆ

-Հարցին կպատասխանի արդարադատության նախարար Հրայր Թովմասյանը։

Հ.ԹՈՎՄԱՍՅԱՆ

-Շնորհակալություն։ Պրն Բաբուխանյան, Սաֆարովի գործով կարող եմ ասել այնքան, որքան թույլ է տալիս այս պահին՝ գործի շահերից ելնելով։ Ամբողջ ծավալով աշխատանքները կատարվում են, բոլոր ուղղություններով կատարվում են աշխատանքներ, բացի նախարարության աշխատակիցներից, ներգրավված են նաեւ այլ փորձագետներ, որոնք մեզ օգնում են էդ ուղղությունով։ Այսինքն, սրանից ավել, եթե անհրաժեշտություն կա, առանձին կարող եմ ներկայացնել։

Փորձեմ ձեր երկրորդ հարցի հետ կապված, որը վերաբերում էր Խաչատրյանի եւ այլոց ընդդեմ Հայաստանի գործով Եվրոպական դատարանի վճիռը։ Պիտի ուշադրություն դարձնեք, որ խոսքը վերաբերում է 2005 թվականի մեր 19 քաղաքացիները, որոնք դիմել են Եվրոպական դատարանին, կարծում էին, մատնանշում էին կոնվենցիայի մի քանի խախտումներ. 5-րդ հոդված՝  ազատություն եւ անձեռնմխելիություն, 6-րդ հոդված՝ արդարադատական քննություն, 9-րդ հոդված՝ խղճի եւ դավանանքի ազատություն, 13-րդ հոդված՝ իրավական պաշպանության արդյունավետ միջոցներ եւ 14-րդ հոդված՝ խտրականության արգելք։

Պիտի ասեմ, որ երկուսի վերաբերյալ ընդհանրապես մերժվել է, մնացածի մասով, ըստ էության, կայացվել է վճիռ մոտավորապես 1 հոդվածով՝ ազատության եւ անձեռնմխելիության իրավունքով։ Բայց, ցավոք սրտի, 2005 թվականին այս քաղաքացիները, որոնք խուսափել են այլընտրանքային զինվորական ծառայությունից եւ վերցվել են կալանքի, մենք մեր Քրեական օրենսգրքում չենք ունեցել այլընտրանքային զինվորական ծառայությունից խուսափելու համար պատժատեսակ, ունեցել ենք զինվորական ծառայություն։

Ձեր հարցադրումը, որ արդյո՞ք ռիսկ ունենք, որ դա կկրկնվի, ասում ենք՝ ռիսկ չունենք, որովհետեւ արդեն 2006 թվականին Քրեական օրենսգրքում փոփոխություններ են կատարվել, այս մասով մենք ռիսկ չունենք։ Եկող շաբաթ արդեն համապատասխան հանձնաժողովում կքննարկվի «Այլընտրանքային զինվորական ծառայության մասին» օրենքը եւ շատ ու շատ հարցերի պատասխան, եւ հետագայում, որպեսզի նման խնդիրներ չառաջանան, այդ օրենքը, ըստ էության, կլուծի։

Ինչ վերաբերում է «Հասարակական կազմակերպությունների մասին» օրենքին, դուք ճիշտ եք նշում, որ էդ հրապարակայնությունը պետք է լինի, էդ հաշվետվողականությունը պետք է լինի։ Պարզապես, Արդարադատության նախարարությունը չունի էդ լիազորությունները, որպեսզի էդ ամբողջն իրականացնի, եւ եթե, անշուշտ, համաձայն ենք, եղել է ժամանակին, մոտ մի քանի տարի առաջ մի նախագիծ, շրջանառության մեջ է դրվել, բայց ինչ-ինչ պատճառներով այնուհետեւ շրջանառությունից դուրս է եկել։

Կա այսօր էլ շրջանառության մեջ եւս մեկ օրենք «Հասարակական կազմակերպությունների մասին», որը նրանց գործունեության հրապարակայնության ավելի լայն դաշտ, ավելի լայն աստիճան պետք է ապահովի, այդ թվում նաեւ՝ ֆինանսական միջոցների հաշվետվությանն է առաջին հերթին վերաբերում, եւ իրենք պարտավոր կլինեն որոշակի պարբերականությամբ, 1 կամ 2 տարի պարբերականությամբ այդ ամբողջը տեղադրել հանրային իրազեկման կայքում, այս պարագայում «Ազդարար.ամ»-ում։

Այդ նախագիծը շրջանառության մեջ է, եւ հուսով եմ, որ այս նստաշրջանում արդեն իսկ մենք կհասցնենք դրանք քննարկել։ Պարզապես, այս պահին այդ հաշվետվությունները, որոնք դուք նշում եք, դրա...

Հ.ԱԲՐԱՀԱՄՅԱՆ

-2-րդ խոսափող։

Հ.ԲԱԲՈՒԽԱՆՅԱՆ

-Հարգելի պրն Թովմասյան, ինչ վերաբերում է առաջին հարցին, պարզապես կխնդրեի, երբ որ նման հարցեր կլինեն, օրենքով նախատեսված կարգով, 3 օր առաջ զգուշացրեք, կքննարկենք միասին հարցերը, սա՝ մեկ։

Երկրորդը՝ ինչ վերաբերում է իրավասություններին, կարծում եմ, որ քանի որ հենց բնագավառի կառավարման լիազոր մարմինը դուք եք, եւ դուք ունեք հնարավորություն պահանջելու, որպեսզի օրենքը կատարվի կամ պահանջելու ինչ-ինչ փաստաթղթեր, տվյալ դեպքում հենց հաշվետվությունը, որը որ թաքցված է հասարակությունից, եւ հրապարակայնությունը չի ապահովված։ Ապա, իմ կարծիքով, այստեղ կարող եք իրականացնել ձեր լիազորությունները, ինչպես նաեւ կարող եք նկատողություն տալ։ Ցավոք սրտի, տվյալ կազմակերպությունների վերաբերյալ դուք ինձ տեղեկացրեցիք, որ նկատողություններ չեն տրված, թեեւ, իմ կարծիքով, իրենք ակնհայտորեն, ցուցակը ձեզ մոտ է, ակնհայտորեն խախտել են ՀՀ օրենքը։

Ինչ վերաբերում է եհովականներին, ապա ես շատ ուրախ եմ, որ դուք պատասխանում նշեցիք, որ երբ որ մեզ Եվրադատարանը տուգանել է 112 հազար եվրո, ապա խնդիրը ոչ թե  կրոնական խտրականությունն է, այլ խնդիրը, ուրեմն, վերաբերում է նրան,  որ իրենց իրավունք չունեին այն ժամանակ Քրեական օրենսգրքով կալանավորելու։ Վերջը, շատ կարեւոր է, որ հասարակությունն էլ տեղեկացված լինի, որ ՀՀ-ում կրոնական խտրականություն չկա, եւ Եվրադատարանը, երբ որ ինչ-ինչ որոշումներ է կայացնում, ապա դա զուտ պրոցեսուալ, կարելի ա, այդպես անվանենք, հա։ Եվ ավելին, ես կասեի, որ ճիշտ կլիներ, որ այն  պաշտոնյաները, որոնք թույլ են տվել այն ժամանակ այդ խախտումը, նույնպես ինչ-որ ձեւով ադմինիստրատիվ տույժ կրեին, որովհետեւ օրենքը մնում է օրենք բոլորի համար։

Եվ կարծում եմ, որ այն ցանկի վերաբերյալ՝ 20 հասարակական կազմակերպությունների վերաբերյալ, որոնք չեն կատարում իրենց պարտականությունը, չեն աշխատում հրապարակայնորեն, օրենքը դրանով իսկ խախտում են, նախարարությունը կգտնի լծակներ։ Շնորհակալություն։

Հ.ԹՈՎՄԱՍՅԱՆ

-Շնորհակալություն։ Կարծեք թե, բոլոր հարցերին, էսպես, տրվեց պատասխան։ Թե՛ կառավարության նիստում քննարկման ժամանակ, թե՛ հրապարակայնորեն միշտ նշվել է, որ մենք գործ ունենք, ըստ էության, 5-րդ հոդվածի խախտման հետ, եւ ոչ թե 9-րդ հոդվածի խախտում դեռեւս չի արձանագրվել, բայց մենք գործեր ունենք, դեռեւս վճիռներ չկան, բայց մենք գործեր Եվրոպական դատարանում սրանցով ունենք։ Եվ այն օրենքը, որ նշեցի, այս խնդիրների լուծմանը, ըստ էության, ուղղված կլինեն։ Շնորհակալություն։